Помилуй мя Боже, по велицей милости Твоей. И по множеству щедрот Твоих очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю и грех мой предо мною есть выну. Тебе единому согреших и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся. Омыеши мя и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене oт лица Твоего, и Духа Твоего Святаго не отыми от мене. Воздаждь ми радость спасения Твоего и Духом Владычным утверди мя. Научу беззаконныя путем Твоим и нечестивии к Тебе обратятся. Избави мя от кровий Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо; всесожжения не благоволиши. Жертва Богу – дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона; и да созиждутся стены Иеросалимския. Тогда благоволиши жертву правде, возношение и всесожигаемая. Тогда возложат на олтарь Твой тельца.
Псалом 101.
Господи, услыши молитву мою, и вопль мой к Тебе да приидет. Не отврати лица Твоего от мене, вонь же день аще скорблю, приклони ко мне ухо Твое, вонь же день, аще призову Тя, скоро услыши мя. Яко исчезоша, яко дым дние мои, и кости моя, яко сушило сосхошася. Уязвен бых, яко трава, и изсше сердце мое, яко забых снести хлеб мой. От гласа воздыхания моего, прильпе кость моя плоти моей. Уподобихся неясыти пустынному, бых яко нощныи вран на нырищи. Забдех, и бых яко птица особящаяся назде. Весь день поношаху ми врази мои, и хвалящии мя мною кленяхуся. Зане пепел, яко хлеб ядях, и питие мое с плачем растворях. От лица гнева Твоего, и ярости Твоея, яко вознес низверже мя. Дние мои, яко сень уклонишася, и аз яко сено изсхох. Ты же Господи, во веки пребываеши, и память Твоя в род и род. Ты воскрес ущедриши Сиона, яко время ушедрити его, яко прииде время. Яко благоволиша раби Твои камение его, и персть его ущедрят. И убоятся языцы имене Господня, и вси царие земстии славы Твоея. Яко созиждет Господь Сиона, и явится в славе Своей. Призре на молитву убогих, и не уничижи моления их. Да напишутся сии в род их, и людие зиждемии восхвалят Господа. Яко призре с высоты святыя Своея, Господь с небесе на землю призре. Услышати воздыхание окованных, разрешити сыны умерщвенных. Возвестити в Сионе имя Господне, и хвалу Его во Иеросалиме. Внегда собратися людем вкупе, и царие работати Господеви. Отвеща ему на пути крепости его, умаление днии моих возвести ми. Не возведи мене в преполовение днии моих, в род и род лета Твоя. В началех Ты Господи, землю основа, и дела рук Твоих суть небеса. Та погибнут, Ты же пребываеши, и вся яко риза обетшают, и яко одежду свиеши их, и изменятся. Ты же тожде еси, и лета Твоя не оскудеют. Сынове раб Твоих вселятся, и семя их в век исправится
Аминь.
Помилуй нас Господи, помилуй нас, всякаго бо ответа недоумеюще, сию Ти молитву, яко Владыце, грешнии раби Твои приносим. Помилуй нас Господи, помилуй нас.
Слава. Господи, помилуй нас, на Тя бо уповахом. Не прогневайся на ны зело, ниже помяни беззаконии наших. Но призри на ны, яко Милосерд, и избави нас от враг наших. Ты бо еси Бог наш, и мы людие Твои, и вси дела руку Твоею, и имя Твое призываем.
И ныне, Богородичен. Милосердия двери отверзи нам, благословеная Богородице Дево, надеющиися на Тя не погибнем, но да избавимся Тобою от бед. Ты бо еси спасение роду християнскому.
Господи помилуй (40), Слава, и ныне.
Честнейшую херувим (поклон великий).
Именем Господним благослови, отче.
За молитв святых отец наших.
Аминь.
Владыко Боже Отче Вседержителю, и Господи Сыне Единородныи Исусе Христе, и Святыи Душе, едино Божество, и едина сила, помилуй мя грешнаго и ими же веси судьбами, спаси мя недостойнаго раба Твоего, яко благословен еси во веки, аминь.
Приидите, поклонимся (трижды, и поклоны три).
Господи, услыши молитву мою.
Боже, в помощь мою вонми. Господи, помощи ми потщися. Да постыдятся и посрамятся ищущии душу мою. Да возвратятся вспять и постыдятся мыслящии ми злая. Да возвратятся абие стыдящеся, глаголющии ми: благо же, благо же. Да возрадуются и возвеселятся о Тебе, вси ищущии Тебе Боже, и глаголют выну: да возвеличится Господь, любящии спасение Твое. Аз же нищь есмь и убог, Боже помози ми. Помощник мой и Избавитель мой еси Ты, Господи, не закосни.
Псалом 142.
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку, и уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь, воньже поиду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой Благии наставит мя на землю праву. Имене Твоего ради Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающия души моей, яко аз раб Твой есмь.
Слава в вышних Богу, и на земли мир, в человецех благоволение. Хвалим Тя, благословим Тя (поклон), кланяемтися, славословим Тя (поклон), благодарим Тя великия ради славы Твоея (поклон).
