Во имя Отца и Сына и Святаго Духа.

Се аз, князь Владимир, нареченый во святом крещении Василий, сын Святославль, внук Игорев, и божественныя княгини Олги, принял есмь крещение от греческаго царя и от Фотия, Патриарха Цареградскаго, и приях от него перваго митрополита Михаила Киеву, (л. 474) [1741] иже крести всю Рускую землю святым крещением. Потом развергше греческий Номоканон, обретох в нем о самой истины святых апостол и святых отец предание и перваго правовернаго царя Константина и всех прежних царей христианских на всех Вселенских соборех исправления о судех церковных и о всем священническом чину и о десятинах, яже не подобает сих судов и тяж князю судити, ни бояром его, ни тиуном.

И аз с своими детми и со всеми князи и с своими бояры дал есмь те суды церквам Божиим, преосвященному митрополиту и всем епископиям по Рустей земли. А по сем (л. 474 об.) [1742] не надобно вступатися ни детем моим, ни внучатом, ни всему роду моему до века, ни в люди церковныя, ни во все суды их. То все дал есмь церкви Божии по всем градом и по погостом и по слободам, где суть христиане, и своим тиуном приказываю судов церковных не судити и наших судов без владычня судии не судити десятин деля.

А се людие церковныя преданы епископом по правилом: епископ, игумен, поп и дети их, диакон, причетник, кто в клиросе стоит, чернецы, черница, попадья, просвирница, паломник, чтец, баба, вдовица, задушный человек, (л. 475) [1743] стороник, слепец, хромец, монастыри, болницы, гостинницы, странноприемницы, богаделны, то люди церковныя, епископ ведает меж ими суд или обида или которая вражда или задница.

О церковных судех.

А се церковныя судове, данныи законом Божиим по правилом святых апостол и святых отец и по уставом православных царей и князей во всех христианских людех: роспуты, смилное застатие, пошибание, умычки, промеж мужем и женою о животе их, в племяни или в сватовстве поймутся, ведовстов, потворы, чародеяние, волхование, зелейни(л. 475 об.)чество [1744], урекания три, бляднею и зелием и еретичеством, зубоежа, или сын отца и матерь биет или дщи матерь биет, или сноха свекровь, или дети тяжутся о задницу, церковная татьба, мертвецы сволочат, крест посекут или на стенах третки емлют и с креста, скот или псы или потки без великия нужды введет в церковь, или что неподобно в церкви деет, или два друга имета ся бити, единаго жена другаго имет за лоно и раздавит, или кого застанут с четвероножиною, или кто под овином молится, или во ржи, или под рощением, или у воды, (л. 476) [1745] или девица дитя повержет, те суды все церквам даны суть.

Основания инаго никто же может положити, паче лежащаго, да вси сограждают на сем основании. И иже аще кто разсыплет храм Божий, разсыплет того Бог, церкви бо Божия свята есть. Аще кто изменит святый сей устав, якоже есмы уставили по святых отец правилом и первых царей управлению, или сынове мои князи, или внуцы мои, или правнуцы мои, или от рода моего кто, или от князей, или от бояр, или в котором городе наместник, или судия, или тиун, а порушат ряд мой и вступятся в суды (л. 476 об.) [1746] церковныя, или отъимати, да будут прокляти в сий век и в будущии от седми собор Вселенских.

О тех же судех великаго князя Ярослава, сына великаго князя Владимира, крестившаго Рускую землю.

Се аз, князь великий Ярослав, сын Владимирь, по данию отца своего, згадал есмь с митрополитом Иларионом, сложил есмь греческий Номоканон, аже не подобает сих тяж судити князю и бояром, дал митрополиту и епископом те суды, которыя по правилом святых апостол и святых отец отдал отец, великий князь Владимир, по всем градом и по всей области, где (л. 477) [1747] христианство.

Аще восхощеши, еще ти приложим и от прежде бывших Ордынских царей законов, то есть ярлыков, иже даша в лето 6821-е преосвященному Петру митрополиту Киевскому и всея Росии чюдотворцу и прочим митрополитом, яко да и тии в день Судный востанут, якоже царица Южеская с родом сим и осудят и, аще не покаются.

В нем же есть тако писано.

Вышняго и безсмертнаго Бога силою и волею и величеством и милостию Его многою азбяково слово всем нашим князем великим и средним и нижним и силным воеводам, (л. 477 об.) [1748] велможам и князем нашим уделным, и дорогам славным, и полским князем, высоким и нижним, и книжником, и уставодержалником, и учителным людским поветсником, избирателем и баскаком, и послом нашим и гонцом, и данщиком, и писцом, и мимоездящим послом, и ловцом нашим, и соколником, и пардусником, и всем людем, высоким и нижним, малым и великим нашего царьства, по всем нашим странам, по всем нашим улусом, где наша Бога безсмертнаго сила власть держит и слово наше владеет. (л. 478) [1749] Да никто же обидит на Руси соборную Церковь митрополита Петра и его людей и церковных его, да никто же взимает, ни стяжаний, ни имений, ни людей. А знает Петр митрополит в правду и право судит и управляет люди своя в правду в чем ни будь, и в розбое, и в поличном, и в татбе, и во всяких делех ведает сам Петр митрополит един или кому прикажет. Да вси покаряются и повинуются митрополиту вся его церковныя причты, первым изначала законом их и первым грамотам нашим первых царей великих грамотам (л. 478 об.) [1750] и дефтерем, да не вступаются в церковное и в митрополичье никто ж, занеже то Божие все суть. А кто вступится, а наш ярлык и наше слово преслушает, тот есть Богу повинен и гнев на себя от Него приимет, а от нас казнь ему будет смертная. А митрополит правым путем ходит да правым путем пребывает и тешитца, да правым сердцем и правою мыслию вся своя церковная [1751] управляет и судит, и ведает или кому повелит таковыя ведати и управляти. А нам в то не вступатца ни во что, ни детем нашим, ни всем нашим (л. 479) [1752] князем нашего царьства и всех наших стран и всех наших улусов да не вступаются никто же ничем в церковныя и в митрополичьи, ни в городы их, ни в волости их, ни в села их, ни во всякия ловли их, ни в борти их, ни в земли их, ни в улусы их, ни в лесы их, ни во ограды их, ни в волостныя места их, ни в винограды их, ни в мелницы их, ни в зимовища их, ни в стада их конныя, ни во всякия скотския стада, но вся стяжания и имения их церковныя и люди их и вся причты их и вся законы их уложеныя старыя от начала их, то все ведает митро(л. 479 об.)полит [1753] или кому прикажет, да не будет ничто же перечинено или порушено или кем изобижено [1754]. Да пребывает митрополит в тихом и кротком житии без всякия голки, да правым сердцем и правою мыслию молит Бога за нас и за наши жены и за наши дети и за наше племя. И мы то такожде управляем и жалуем, якоже и прежние цари ярлыки им давали и жаловали их, а мы по тому же пути теми же ярлыки жалуем их, да Бог нас пожалует, заступит. А мы Божия брежем, а даннаго Богу не взимаем, а кто взимает Божия, и тот будет Богу повинен, а гнев Божий (л. 480) [1755] на него ж будет, а от нас будет казнен смертною казнью, да то видя, и иныя в боязни будут. А поедут наши баскаки и таможники, данщики, поборщики, писцы по сим нашим грамотам, как наше слово молвило и уставило, да все будут целы соборныя церкви митрополичьи, никем ни от кого не изобижены вся его люди и вся стяжания его, как ярлык имеет. И архимандриты и игумены и попы и вся причты церковныя ничем никто да не будет изобижен. Дань ли на нас емлют или иное что ни буди, тамга ли, поплужное ли, ям ли, мыт ли, (л. 480 об.) [1756] мостовшина ли, война ли, ловитва коя ни буди наша, или егда на службу нашю с наших улусов повелим рать збирати, где восхотим воевати, а от соборныя Церкви и от Петра митрополита никто же да не взимает и от них людей и от всего его причта. Те бо за нас Бога молят и нас блюдут и наше воинство укрепляют, кто бо того и прежде нас не ведает, что Бога безсмертнаго силою и волею живут все и воюют, то все ведают. И мы, Богу моляся, по первым царей грамотам грамоты им давали жаловалныя, а не изыначивали ни в чем. Как то (л. 481) [1757] было прежде нас, так молвя и наше слово уставило, по первому пути которая дань наша будет, или запросы наши накинем, или поплужное, или послы наши будут, или кормы наши, или коней наших или подводы, или корм послов наших, или наших цариц, или наших детей и кто ни есть и кто ни буди, да не взимают, да не просят ничто же. А что возмут, и они отдадут назад третицею, аще будет взяли за нужу великую, а от нас им будет некротко, а наше око тихо на них не смотрит. А что будут церковнии люди, ремесленицы кои или писцы, или (л. 481 об.) [1758] каменныя здатели, или древяныя, или иныя