Се ты уже состаревся, сынове же твои не ходита по пути твоему, то [1563] постави ныне над нами царя: да ны судит, якоже и прочии языки. И бысть лукавны глаголы пред очима Самоиловыма, егда реша, дай же нам царя, да ны судит. И помолися Самоил ко Господу и рече Господь Самоилу: Послушай гласа людей, (л. 981) [1564] якоже глаголют к тебе, яко не тебе уничижиша, но Мене, не царьствовати Ми над ними, и вся творения, яже сотворих, от него же дне изведох их из земли Египецкия до днешняго дне, оставльше Мя, послужиша богом инем. Тако и тебе тии творят. И ныне послушай гласа их, обаче засвидетельствуя, засвидетельствуеши им, и возвестиши им правду цареву, иже царьствовати будет над ними. И рече Самоил вся словеса Господня к людем, просящим от него царя и глагола им: Се есть оправдание царево, иже царьствует над вами, сыны ваша возмет и положит я во оружии его, и на кони всадит их и предтекущая пред колесницами (л. 981 об.) [1565] его, и поставит тысящники себе и сотники и жателми жатвы своея, и обымут обыманием гроздия у него, и сотворити сосуды победы своея и сосуды колесниц своих. И села ваша и винограды ваша и маслины ваша и благая ваша возмет и даст рабом своим, и семена ваша и вино ваше одесятерит и даст скопцем своим и рабом своим. И рабы же ваша и рабыня и стада ваша благая и ослы ваша отъимет, удесятерит на дело свое, и паствины ваша одесятерит, и вы будете ему в рабы.
Не сия ли вся ныне в нас суть, яже вышеписаная? Не селы ли, освященная (л. 982) [1566] Господеви, и паствины и скоты и жита и вся благая наша царь наш взят себе? Не архиереи ли и священницы рядницы быша воинством?
Паки древним да воследуем. И возопиете от лица царя вашего в день он, его же избрасте себе, и не услышит вас Господь в день он, яко вы сами себе избрасте царя. И не восхотеша людие послушати Самоила и реша ему: Ни, но царь да будет над нами, и будем и мы, яко и вси языцы, и да судит нам царь наш. И слыша Самоил вся глаголы людей и изглагола я во уши Господеви. И рече Господь к Самоилу: Послушай гласа их, постави им царя. О [1567] них же глаголет Иосия от лица Божия: Аз, Господь Бог, (л. 982 об.) [1568] утверждаяй небо и созидаяй землю, Его же руце стяжасте все воинство небесное, и не показах ти его, яко ходити во след их. Аз [1569] изведох тя из земли Египетския, и Бога разве Мене да [1570] не познаеши, и спасающаго несть, разве Мене. Аз пасох тя в пустыни, на земли невселенней, по паствам их, и умножишася до исполнения и вознесошася сердца их. Сего ради забыша Мя, и буду им яко Панфир, и яко рысь на пути асирийстем, и срящу я, яко медведь лиховаем, и разрушу сключение сердце их, и изъядят я [1571] щенцы дубравнии и зверь полский расторгнет я. В разсыпание твое, Израилю, кто поможет (л. 983) [1572] тебе? Где царь твой? Той да спасет тебя во всех грехах твоих и да судит ти, ему же глагола: Даждь царь и князь. И дах царя во гневе своем и удержахся в ярости Моей.
Сия написахом, не яко царя оглаголуя, но непреподобное его деяние, и иже хощет, да слушает царя и суд приемлет от него. Нам же Христос Бог наш Собою узаконоположи, не послушати, ни отвещати пред беззаконными судии, но обличати.
В [1573] той час, рече Иисус народом, яко на разбойника ли изыдосте со оружием и дреколми яти Мя. По вся дни при вас седех в церкви, уча, и не ясте Мене. Архиерей [1574] же вопроси Иисуса о ученицех Его и отвеща ему Иисус: Аз, не обинуяся, глаголах миру. Аз всегда учих на сонмищах и в церкви, идеже вси людие снемлются, и тай не глаголах ничесо же. Что Мя вопрошаеши? Вопроси слышавщих, яже рех Аз.
Егда [1575] же во ини емше Иисуса, приведоша к Каиафе архиереови, идеже книжницы и старцы собрашася. Архиерей же и весь сонм искаху на Иисуса свидетельства, да умертвят Его, и не обретаху. Мнози бо лжесвидетельствоваху нань, и равна свидетельства не бяху. И нецый восташа, лжесвидетельствоваху нань, глаголюще, яко: Мы [1576] слышахом Его, глаголющ, яко Аз разорю церковь сию рукотвореную (л. 984) [1577] и треми [1578] денми ину, нерукотвореную, созижду. И ни тако равно бе свидетельство их. И востав архиерей посреде, вопроси Иисуса, глаголя: Не [1579] отвещеваеши ли ничесо же, что сия на Тя свидетельствуют. Иисус же молчаше и ничесо же отвещаваше.
Зриши ли, жидовский подражателю, како неправедно на суд ведомый Христос Бог наш пред неправедными архиереи и старцы жидовскими не отвещал, всем образ верующим в Него дал, но и поругался вопрошающим с клятвою.
И отвещав, архиерей рече Ему: Заклинаю тя Богом живым, да речеши нам, аще Ты еси Христос, Сын Божий? Глагола ему Иисус: Ты рече. (л. 984 об.) [1580] Таже реша вси: Ты ли убо еси Сын Божий? Он же к ним рече: Вы глаголете, яко Аз есмь. Они же реша: Что еще требуем свидетельства? Сами бо слышахом от уст Его.
О жидове беззаконнии, что слышали? Слышали, яко вы глаголете: Аз есмь, а не Сам той. Почто неправедно свидетельствуете, яко сами слышахом от уст Его. Тако и ныне, жидом подражая, лжуще, нецыи глаголют, якоже ты, совопросниче, и подобнии тебе. Сам де Никон на волю государеву положился в суде, как государь да изволит. Никон чрез Божественая веления никогда не глаголет, ни хощет, да что будет. (л. 985) [1581] Но глаголал Никон к вопрошающим, посланым от царя, Божественыя законы царем не повелевают возложеным Господеви обладати, движимыми и недвижимыми вещми, ниже судити, но кто хощет, тот от него суд приемли. Нам же и до последней срачицы в суд приходити Христос возбранил. А будет царь нуждею повлечет, якоже и жидове Христа и святых Его апостол мучителски, и на то есть свыше Царь царем и Господь господем, иже обещался всякую неправду неправедником и насилующим отмстити вскоре, якоже и прежде гордящим и превозносящимся над Божиим достоя(л. 985 об.)нием [1582] и наследием, множицею мстил. Есть Бог неправедно судящим [1583], якоже фараону, Моаву, Гевалу, Аммону и Аммалику, и Ассиру, Мадиаму и Сисаре, и Авиму в потоце Киссове, и Ориву, и Зиву, и Зевею, и Салмону, Дафану и Авирону, Новуходоносору, царю Вавилонску, неправедно судившаго Даниилу пророку и трием отроком, и Валтасару, глумящемуся во святых сосудех, и Саулу, пожирателю скверне, Иозии, непреподобно кадящему, и Ахаву, пророкоубийце и гонителю, Ироду и Понтийскому Пилату, архиереем и старцем жидовским и прочим святых пророком и святых апостол (л. 986) [1584] и всех святых неправосудцам, гонителем и убийцам, Максентию, Иулиану законопреступнику, Иуаленту, их же именословити оставим ныне, но на предглаголемая обратимся.
Послушай, совопросниче, жидовских зол ревнителю, како Господь наш Иисус Христос к вопрошающим жидом не отвещал, такожде егда приведен Господь наш Иисус Христос пред игемона, и вопроси Его игемон, глаголя [1585]: Ты ли еси царь Июдейск? Иисус же рече ему: Ты глаголеши. И егда нань глаголаху архиерее и старцы, ничесо же не отвещавше. Тогда глагола ему Пилат: Не слышиши ли, колико на Тя свидетельствуют? И не отвеща ему ни ко единому глаголу, яко дивитися иге(л. 986 об.)мону [1586] зело.
Толкование [1587].
Яко о царьских вещех оклеветаем, веден бысть к Пилату Господь, отнюду же и вопрошает Его, аще приложил есть воцаритися над жидовы. Иисус же рече ему: Ты глаголеши. Ответ премудр отвеща ему. Ни бо, рече, яко есмь, ниже паки яко несмь, но между некако рече: Ты глаголеши. Се бо есть и сице разумети, яко ты глаголеши, есмь, или сице, яко Аз не глаголю се, но ты глаголеши. Иноже ничто же отвеща, ведяше бо судище, яко не по правде идет, купно же, яко презирающа и не боящася смерти, купно же, и како премудру сущу и сло(л. 987)весну [1588] и тысящи могущу предложити, но отвещание. И не хощет ничто же отвещати, но оболгающих Его презираше. Научаем же ся и мы от сего, егда растленно судище зрим, ничто же глаголати, да не молву множайшу творим, ниже множайшему осуждению вина будем, не хотящих послушати глаголы наша.
Вниде [1589] же паки Пилат в претор и гласи Иисуса и рече Ему: Ты ли еси царь Июдейск? И отвеща ему Иисус: О себе ли ты се глаголеши, или инии тебе рекоша о Мне? И отвеща Пилат: Еда аз жидовин есмь.
Зри, совопросниче, второе Пилатово вопрошение, Иисусово отвещание: О себе ли ты се (л. 987 об.) [1590] глаголеши, или инии тебе рекоша о Мне? Се же сотвори, да обличит жидовское. Таже отвеща Ему Пилат: Еда аз жидовин есмь, не Иисуса укоряя, но жидовское злодейство, род Твой, рече, архиерее предаша Тя мне. Что еси сотворил? Отвеща Иисус: Царьство Мое
