Цареградской престол точию во Цареграде описуется и Иерусалимский во Иерусалиме. Хощеши ли, аз ти в мале покажу. Да почто вселенстии патриарси исходят от своих престол по странам и достизают даже и до зде, яже и при нас быти тем. Иже суть Константинополскому Афанасию, Антиохийскому Макарию, Иерусалимскому Паисею, якоже и прежде бывшим Константинопол(л. 147)скому [555] Иеремию, Иерусалимскому Феофану, прочих митрополит и архиепископов и епископов, Бог число их изочтет, да почто аще и вне своея епархии обреталися, но койждо своею титлою престола писалися и именовалися, якоже и ты днесь зде пишешися и именуешися Газский митрополит в чюждей епрахии. Да уже не леть есть, глаголеши, нам в своей епархии именоватися, еже злаго ради времени отшедшим. Почто ты в чюждей пишешися и именуешися Газским, да где есть Газа и колико время преходя скитаешися от нея, аки змий, ползая по земли, изблевая смертоносная своя беззаконная слова и уядая простейшия человеки. Сыскать, аще бы (л. 147 об.) [556] о тебе колико от Газы, одва и бывал ли в Газе, или есть ли в Газе и седалище или престол архиерейский. У брата сучец видиши, а у себя и бревна не видиши. Лицемере, изми первие бревно изо очесе твоего и потом прозриши изъяти сучец изо очесе брата твоего. Тако Господу заповедующу: Писано [557] есть, не оклеветайте друг друга, братие. Оклеветаяй бо брата своего или осуждаяй брата своего, оклеветает закон и осуждает закон. Аще закон осуждаеши, неси творец, но судия. Един есть Законоположник и Судия, могий спасти и погубити, ты кто еси, осуждаяй друга?
Послушай же (л. 148) [558] святых отец святаго 1-го собора Вселенскаго правило 6.
Египтом или всею и Пентаполиею Александрийский епископ да владеет, и Римский епископ сущими под Римом да владеет, и Антиохийский и прочии епископи своими да обладают.
И Втораго Вселенскаго собора правило 4-е.
Предел ради никто же да смешает Церковь, ни поставляет презвитера, ни епископа. Сущи яже во языцех Божия Церкви, святых отец обычаи да держат.
Толкование.
Во многих правилех речено есть, яко не подобает епископу на чюжую епископию находити, но койждо внутрь своих предел да пребывает.
Сам ты свидетельствуеши, яко Александрийский пренесеся во Египет (л. 148 об.) [559] и Антиохийский в Дамаск. Почто же не пишутся ов Египецкий и ов Дамаскинский, да уже по твоему толкованию и сии извержены суть. Безумне, почто не согласився с Божественным писанием, порицаеши нас без правды? Видел ли еси, яко несть согрешил епископ, внутрь своих предел пребывая, и ниже есть описано место епископу в своей ему епископии где пребывати. Но точию вся святыя правила отрицают и извергают, свою оставя епископию, в чюждих пребывающих, якоже ты, непреподобне, вся святыя правила ни во что вменил еси и яко тать по писаному, не входя дверми, но прелазя инуде, обретаешися, тать бо не преходит, (л. 149) [560] разве да украдет и убиет и погубит, от плод бо познайте их, аще объемлют от терния гвоздие и от репия смокви.
Блюдитеся, рече святый апостол, яко по нашем отшествии внидут волцы тяжце, не щадяще стада Христова, и блюдитесь от псов и лаятелей.
Глаголеши, ответотворче, есть ли бы прилучилось чрез войны разорение или иныя притчи, тогда мощно на иное место пренесть, как учинилося во Антиохии и во Александрии, которые оба престола пренесены суть на иные лутчия места.
Да на что болши войны кому царев гнев понести, по святому Григорию Богослову, якоже выше писано есть. (л. 149 об.) [561] Зриши ли, колик подвиг, колико тщание показует от великаго гнева твоего на мя царь, чтобы какову лжу ни сказал кто сам чрез вся святыя Божия заповеди и апостолския и отеческия правила.
По всей России сыскивает з болшим страхом и прещением о несведомых наших и бысть сам судия и истец. Весь на себя суд и управление архиерейское взял.
Господу заповедающу: Не [562] судите, да не судими будете, им же бо судом судите, осудитеся. И паки. Не [563] судите и не осудитесь, не осуждайте и не осуждени будете.
Ты [564] кто еси судяй чюждему рабу, своему господеви стоит или падает, станет же силен Бог (л. 150) [565] поставити его. Тем же безответен еси, о человече, всяк судяй, им же бо инаго судиши, себе осуждаеши, тая ж де бо твориши судяй. Вемы же, яко суд Божий есть воистину на творящих таковая. Помышляеши же ли се, о человече, судяй таковая, яко ты убежиши суда Божия. И паки.
Не [566] оклеветайте друг друга, братие, не осуждайте, оклеветая ибо брата или осуждаяй брата, оклеветает закон и осуждает закон: аще закон осуждаеши, не си творец, но судия; един есть Законоположник и Судия, могий спасти и погубити. Ты ж кто еси, осуждая друга?
Но сия вся презрев, яко же прежде собор (л. 150 об.) [567] чрез Божественыя правила своим повелением собрал, ему же написание первое сице есть.
В лето от создания мира 7168-е, от воплощения же Господа Бога и Спаса нашего Иисуса Христа 1665-го повелением благочестивейшаго великаго государя царя и великаго князя Алексия Михайловича всея великия и малыя и белыя России самодержца собрашася преосвященнии митрополиты и архиепископи и епископы и архимандриты и игумены и весь освященный собор. Собра же ся вины ради сицевыя, понеже пред сим летом предвоспомянутыя осмыя тысящи во 167-е случися Святейшему Никону Патриарху Московскому и всеа России (л. 151) [568] свой патриаршеский престол оставити. И в нынешнем вышеписаннем лете февраля в 6 день предсташа весь преосвященный собор пред лицем великаго государя царя и великаго князя Алексия Михайловича всеа великия и малыя и белыя Русии самодержца, и слышав от святых уст его великое попечение, зане святая соборная Церковь пастыря и жениха не имеет. Да и преосвященный собор о нем крепко и единодушно праведне, не имея кто ненависти и тщетныя любве, по правилех святых апостол и святых отец разсуждают, памятуя койждо страшный Суд и воздаяние коемуждо по делом его. Они же, преосвященный собор, слыша его пре(л. 151 об.)мудрейшее [569] его, великого государя, повеление, идоша в Крестовую патриаршу полату и наутрее февраля в 17день по его, государя царя и великого князя Алексия Михайловича всеа великия и малыя и белыя Русии самодержца, указу боярин Петр Михайлович Салтыков принес на собор скаски писмяныя. И преосвященнии, прияша скаски, и свидетелей против сказок на соборе допрашивали, священнаго чину по священству, а прочих по святей непорочней евангелской заповеди
В скасках преосвященнаго Питирима митрополита Сарскаго и Подонскаго и болярина князя Алексия Никитича Трубецкаго написано: Патриарх Никон патриаршества своего отрешен (л. 152) [570] с клятвою. А в прочих скасках во всех о отречении патриаршества его написано: Отречеся патриарх патриаршества своего во всех согласно и впредь на патриаршестве обещалися не быти.
И преосвященный собор, сказок слушав, познали: Святейший Патриарх Никон оставил свой патриаршеский престол своею волею. И о том посылали доложить великого государя царя и великаго князя Алексия Михайловича всеа великия и малыя и белыя Русии самодержца болярина Петра Михайловича Салтыкова о указе. И болярин Петр Михайлович Салтыков, пришед на собор, сказал, что великий государь царь и великий князь Алексий Михайлович (л. 152 об.) [571] всеа великия и малыя и белыя Русии самодержец указал преосвященному собору выписать ис правил святых апостол и святых отец о отшествии бывшаго Патриарха Никона. А у выписки указал великий государь быть преосвященному архиепископу Маркелу Вологоцкому и Белозерскому и преосвященному архиепископу Илариону Резанскому и Муромскому, и преосвященному архиепископу Макарию Псковскому и Изборскому, Чюдова монастыря архимандриту Павлу, Александрова монастыря Свирскаго игумену Симону. И по указу великаго государя царя и великаго князя Алексия Михайловича всеа великия и малыя и белыя Русии самодержца преосвященный собор велели (л. 153) [572] выписать ис правил святых апостол и святых отец. А у выписи велели быть преосвященным архиепископом Маркелу, Илариону, Макарию и архимандриту Павлу и игумену Симону. И в той их выписке про патриарш отход и суд правил святых апостол и святых отец Вселенских седми соборов не объявилося, развее о епископех. А Вселенскаго 4-го собора 9-е правило ни митрополита прощает митрополитом судить, но святейшему патриарху, под ним же есть митрополит, или Цареградскому патриарху.
